【Viu】陳慧嫻順利完成5場紅館個唱，騷後受訪指淨返初二嘅一場開始唔捨得，會趁呢幾日休息封開工利是，透露預咗6位數字添！講起頭場佢着深藍色公主裙嗰陣唔小心跌親，嚟咗個華麗轉身，慧嫻搞笑自嘲本身行路奇怪，加上台面凹凸不平、條裙又重，一時唔為意就踩到條裙跌低啦！服裝組事後亦即刻take action，喺條公主裙上加咗兩個手抽位，方便行走之餘又安全好多！慧嫻笑話以為冇整親，點知後來發現膝頭哥瘀咗，好彩冇影響跳舞！
至於第3場李克勤做嘉賓，慧嫻喺跳唱完《跳舞街》之後嗌甩打底褲，佢笑話呢幾日瘦咗所致，彈彈吓咁就甩咗，自稱冇乜儀態嘅佢笑言當下自然反應就係即刻摳返起條褲，第二日都換返條細size啲嘅打底褲，超迅速呀！
第5晚請嚟新朋友ERROR做嘉賓，慧嫻多謝4位錯仔令到更多年青人認識佢，又笑談呢晚「寵幸」肥仔純屬搞笑，咁唔知慧嫻私下同邊個係最friend先？另外，演唱會尾段螢幕播放一條短片，聽見慧嫻大談其內心世界，係咪想搵返個男朋友？聽到有假飛出現又有咩回應？即刻睇足本訪問片啦！
