【Viu】陳慧嫻紅館個唱噚晚去到第四場，請嚟古巨基任嘉賓，原來佢哋私下係好朋友，慧嫻多謝老友助陣：「 其實我哋平時都係聚會嘅腳嚟嘅，我哋會傾心事 。你哋以為我哋『無厘啦更』，其實我哋私底下係好好朋友嚟㗎！」
兩人喺台上話當年，慧嫻問基仔：「喺好多年前你同我講好想同我監製唱片。 我依家想問返你，點解咁嘅？竟然對我有興趣嘅？ 」基仔愕然話：「嘩，你記得呀？因為我有做監製嘛，我哋呢度成萬人對你都有興趣喎！點會『竟然』呀？」慧嫻答道：「咁呀，我想問吓你，今時今日你仲想唔想同我做唱片監製？」基仔開心點頭即應承，佢哋更喺觀眾面前打手印落實！基仔又問慧嫻：「你係咪要休息一陣？今晚條打底褲得唔得? 我今晚我都著咗條打底褲嚟喎。」慧嫻笑話：「今晚冇事啦！你著定嚟驚要借俾我呀？」
慧嫻落台底換衫嗰陣，基仔表示自己揀咗慧嫻嘅《Love me once again》，但知道慧嫻期待聽佢唱《愛得太遲》，所以清唱咗幾句！
