【Viu】陳慧嫻紅館騷噚晚去到第三場，觀眾反應熱烈搞到慧嫻自己情緒都超高漲，跳舞時勁興奮仲跳到打底褲都甩埋！當佢同嘉賓李克勤唱完《跳舞街》之後，即刻大叫：「克勤呀！我唔知係咪瘦咗呀，我條褲甩咗落嚟，我入面嗰條打底褲呀，你幫我搞搞得唔得？」克勤就尷尷尬尬笑住話：「我有家室㗎啦喎......」慧嫻回應：「唔緊要啦，當睇唔到啦今晚！」克勤再話：「搵個女dancer過嚟啦，過年流流......」引得觀眾大笑！
慧嫻同克勤由20歲相識，寶麗金年代已同一間唱片公司，依家又喺英皇做返同事。慧嫻話：「佢係李克勤！佢值得啟德個館咁大掌聲呀！」克勤笑住話：「咁客氣呀，識咗幾十年。」
慧嫻分享：「 就係識咗幾十年，我哋好少喺台講真心話，通常真心話都係我哋係電話講，佢真係一個天才嚟㗎！我做咩都問佢意見，今次演唱會佢都特登第一場就嚟睇，又俾咗好多意見我，好多我諗唔到嘅嘢，佢都諗到。咁多年，我做咩節目，接咩工作，佢都俾好多意見我，我乜都問佢，不過近半年我見你不停咁巡迴演出，飛去呢度飛去嗰度，我都唔敢打咁多電話俾你，有時見到都覺得有啲心痛，做咩咁辛苦啊？」克勤回應：「嘩，我有少少眼眨淚光添，我家庭負擔重嘛。」
慧嫻就訓話老友：「唔好咁辛苦！等佢哋好似你咁白手興家！自己賺錢！」克勤回應話：「都要洗㗎，男人需要安全感嘛，我咪努力搵錢囉。」慧嫻即刻話：「第日我冇得食，唔該你救濟下我啦，as my best friend ，我知你一定會。」
到克勤獨唱時就講起自己第一晚就嚟捧場，「我都未試過做人嘉賓要跳舞嘅，誠意十足㗎啦，睇咗一次先，有定心理準備。今晚揀咗一首慧嫻冇喺演唱會揀嘅歌比大家！」克勤之後就唱出慧嫻嘅經典名曲 《去吧》，令觀眾聽出耳油！
