【Viu】陳慧嫻紅館騷《The Fabulous 40 Priscilla LIVE IN HONG KONG 陳慧嫻演唱會》頭場，去到中段，慧嫻姐姐着咗一條藍色bling bling嘅公主裙，兼腳踏約5吋高踭鞋，當佢自讚好靚嗰陣，喺轉身嗰陣失重心踩到條裙跌低，但慧嫻姐姐巧妙將呢一跌變成擺pose！音樂總監何秉舜秒衝出台救駕，慧嫻姐姐笑嘲唔會再讚自己靚，一讚就變唔靚！喺邊度跌低就喺邊度企起身，攞返起支咪繼續唱歌！
慧嫻姐姐唱咗大半場慢歌，係時候帶領全場企起身跳舞開party！帶嚟一段快歌medley同fans狂歡，佢着返條短裙仔、換返對平底鞋，變身punk girl又扭腰、又被dancers抬起、又high爆跑勻四邊同fans隔空握手，氣氛高漲！
唱到金曲《跳舞街》中段時介紹頭場嘉賓張敬軒出場，講到同軒公嘅淵源，慧嫻姐姐話係喺好多年前收到軒公嘅同事一個電話，話軒公想翻唱佢嘅歌，二人嘅緣份就係咁開始咗！慧嫻姐姐大讚軒公份人超窩心、對前輩有禮、又提攜後輩，直頭讚到軒公紅都面晒！自認小fans嘅軒公指為咗做演唱會嘉賓，有重溫返慧嫻姐姐對上一次嘅演唱會，最後揀咗《與淚抱擁》送畀大家！
而頭場嚟睇騷嘅有楊受成博士同夫人、李克勤與盧淑儀夫婦、毛舜筠與區丁平夫婦、沈震軒同女友陳欣妍、鄧小巧、黎峻及海兒等，快啲去片聽歌啦！
