【Viu】古天樂噚日喺澳門出席完電影首映禮，今日又嚟到沙田馬場出席活動，同場仲有嚟表演嘅Gin Lee李幸倪，同埋一班型男包括朱鑑然、馬志威、范麒智以及馮允謙孖生細佬馮重謙等等！
古仔受訪時話配合今日主題紳士風，所以特登著藍色西裝加煲呔，原來以前鍾意玩玩具嘅古仔，而家唯一興趣係買衫，尤其出埠做嘢會睇吓當地設計，疫情時上網買衫試過買錯童裝，最後唯有轉贈俾小朋友親戚囉！古仔話平時都有同朋友細細地夾份買吓馬，贏咗最多食餐飯，會唔會諗吓買隻靚馬做馬主？古仔話冇諗過，覺得養寵物最好喺身邊，但又無可能養隻馬喺身邊，佢都係鍾意小動物多啲！
講到之前喺大陸被問到會唔會開演唱會，佢即刻話唔會。有冇留意黃百鳴開YT Channel唱歌？古仔話冇睇Channel但平時有聽百鳴哥唱歌，仲讚佢唱得幾好，直情可以開演唱會，自己冇佢唱得咁好添喎！嚟緊農曆新年，古仔都係留喺香港陪屋企人，休息同拜年咁啦！
至於Gin Lee就透露嚟緊會出碟，年尾會開騷，新一年想玩多啲，同多啲唔同嘅音樂人或者唔同界別crossover，未合作過嘅都想合作，例如軒公啦！農曆年佢會同家人去旅行，快閃台灣睇A Lin演唱會，趁機休息，以應付今年密集嘅工作！講到同公司嘅謝霆鋒開演唱會，Gin Lee都話收到好多撲飛電話，連好多好耐無見嘅朋友都嚟問，但佢嘅回覆係有啲困難、都幾爆，仲叫大家唔好再搵佢，度閘落得好緊呀！快啲睇足本訪問啦！
