【Viu】樂隊Dear Jane與台灣組合五堅情，呢晚合體喺亞博開騷，最後firm咗「堅珍情」做限定組合名，唔知佢哋之後會唔會真係用呢個名出歌呢？去到音樂會最後兩首歌，喺患感冒嘅邱鋒澤提議下，9位仔仔集體除衫，麒麟臂放題，睇到全場fans㷫烚烚，呢個畫面堅係養眼！之後佢哋仲當咗個Y台做T台，即場嚟咗場猛男show！
show後「親愛的珍」搞笑話當刻見到五堅情個個都有老鼠仔，除完嗰吓都想即刻着返，下次battle肌肉冇有得諗？佢哋又講話呢次同五堅情合作覺得好有趣，只係喺語言上有少少障礙啫，不過Tim就被其他兄弟讚佢係溝通擔當，喺呢個moment，Tim就自爆其實佢一直都聽唔明，咁funny？為咗改善同五堅情嘅溝通，專登請嚟「社工E」Edan幫手，佢哋又覺得有冇幫助先？
五堅情再次同Edan合作都好開心，其中鋒澤指好感動，事關合唱《一表人才》次數一隻手嘅手指數得晒，都想有多啲表演機會！五子大讚香港嘅堅果超熱情，心郁郁之後喺亞博開騷！講返第一次見Dear Jane嘅感受，小賴竟然話覺得某成員個樣好惡，究竟係邊個？之後仲逼埋其他兄弟一齊答，場面爆笑！
婁峻碩剛新婚，咁啱好友Tyson Yoshi亦籌備緊婚禮，有同Tyson交流吓心得？會唔會跟Tyson出露半球mouse pad？可以做埋回禮禮物？提到有堅果指騷前取消咗觀賞綵排環節而唔開心，五子又點回應？
另外，Tim老婆楊洛婷丁父憂，Tim指外父曾換過多次器官，身體唔係好強壯，喺叱咤頒獎禮請大家集氣後曾有好轉，但翌日突然再惡化，總算走得舒服。Tim又指太太受到好大打擊好唔開心，所以會盡快飛去加拿大陪伴佢。
