【Viu】Jeremy@MIRROR孖「三缺一」嘅ROVER成員Kim、亨仔、希晉，今日現身商場活動，同Unicorn、RADAR提早拜年兼玩遊戲！Remy喺台上自爆今個月尾會推出新嘅solo歌，笑言呢首歌係錄得最辛苦、最難，因為冇得唞氣又高音，咁堅係好考唱功喎！同時MIRROR都錄緊新團歌，Remy預告係慢歌嚟㗎！
Remy爆料爆得興起，終極開庫自爆仲有兩份大禮要送畀Unicorn，就係大家期待已久嘅專輯同solo concert啦！聽到呢個消息係咪好hyper呢？Remy加碼再爆專輯入面有自己嘅創作歌添！至於有關隻碟同個騷嘅詳情，Remy就話要先賣個關子，希望佢可以快啲公布啦！
見Remy噚日repost Anson Lo個story預告有搞作，究竟係咩呢？日前現身去撐Stanley喺尖沙咀個pop up store，Remy笑言好少見到大表認真嗰一面，所以邊聽佢致辭邊偷笑！講到MIRROR全員齊以《12怪盜》報名金像獎「最佳男主角」，創金像獎43年歷史，同時獲報名新演員嘅Remy話好開心可以參加盛典，繼續做好自己本份，多謝大家支持！
農曆新年在即，Remy希望有時間可以同MIRROR嘅麻雀腳開枱，如果有機會再同偶像兼雀后阿Sa打牌都好high！ROVER三子就話最重要係向寶姐拜年，唔知佢哋今年會唔會派開工利是呢？三子交代Jason Loi缺席原因，原來佢係同屋企人返葡萄牙探親，已叫定Jason買手信添！佢哋又透露準備咗份情人節禮物畀RADER，係咪會化身邱比特？定會同女fans約會？想知就去片開估啦！
