【Viu】日本殿堂級歌手中村雅俊快閃香港，今日現身記者會宣布5月24日會喺伊館舉行《中村雅俊五十周年紀念演唱會》，大擺心心pose，與時並進！記招現場展示咗小部份中村雅俊嘅黑膠、唱片，以及專登為今次50周年設計嘅場刊！
中村雅俊喺歡呼聲之下登場，打招呼嗰陣大晒流利廣東話：「你好嗎？我係中村雅俊！」佢又話估唔到事隔42年先再嚟香港開騷，好似係一個奇蹟咁！中村雅俊講到上次嚟開騷最難忘嘅事係臨時拉夫，喺fans起哄下叫咗太太上台，不過嚟緊5月嘅呢場騷太太就唔會同行啦，事關太太有個特別任務咁話！得悉有唔少世界各地嘅fans都會嚟支持佢，中村雅俊話好開心，忍唔住沾沾話至今開過1600場演唱會、拍過34套劇集，希望fans除咗支持佢嘅音樂之餘，亦支持佢嘅影視作品！
問到50周年紀念騷會有咩special帶畀fans？中村雅俊自爆會玩樂器，不過就未firm會表演啲咩啦，候選樂器有鋼琴、結他、色士風！講到中村雅俊有好多經典歌曾被改編做廣東話版，例如有《前程錦繡》、《雨中的戀人們》、《一首獨唱的歌》、《聽不到的說話》，會唔會考慮喺個騷上面唱？佢最鍾意又係邊首？又有冇諗過邀請廣東話版嘅歌手上台crossover？即刻去睇足本訪問，等中村雅俊親自話畀你聽！
