【Viu】《培生擂台：無敵盃》We Are Champs 2024將於聽日（4日）喺灣仔修頓場館開戰！各拳手上擂台前夕先進行過磅儀式，拳賽創辦人Derek鍾培生指今屆選手體格好fit，佢話越係表現得和平嘅，上到擂台就越勁，又話呢屆係首次有女拳手加入，都睇好呢場賽事！而上屆嘅參賽拳手霍哥都有現身支持！
Derek透露每位拳手除咗有幾千蚊底薪，仲有5位數字嘅K.O. bonus兼獲部份線上直播收益！見到班拳手個個都磨拳擦掌，Derek笑話都手痕想再上擂台，更點名想同蔣介石後人「北伐司令」蔣友青對壘！咁佢又最睇好邊位拳手勝出？
是次拳賽重點落喺BabyFace同魔筋斌叔呢pair身上，佢哋上磅嗰陣已經勁有挑釁味，兩個不時大聲叫囂，溝女大過天嘅BabyFace即場撩日籍Ring Girl，係咪想笑死人？上屆勝出者之一嘅魔斌叔更揚言會使出還原靚靚拳大絕，誓要將BabyFace打成「ManFace」！BabyFace又驚唔驚被打中面會溝唔到女㗎？自認係零基礎出賽嘅BabyFace話減咗2kg！
提到BabyFace豪言話要一打五兼稱部份參賽拳手係「白卡佬」，佢即刻縮沙話只係gimmick嚟啫，斌叔聽到秒撻着，更大聲向其他拳手報串，嚇到BabyFace鬧斌叔「癡筋」，唔知佢哋keep唔keep到呢團怒火到聽日開戰？而最令大家關注嘅係「緋聞女友」阿儀同梁敏巧會唔會現身撐場？
遠道由日本飛嚟參賽嘅前WBO拳皇野上真司，呢次會對上香港葵芳AK！而野上真司嘅徒弟兼著名YouTuber Andy哥就會同另一著名YouTuber RockGor對打！Andy哥同RockGor上磅嗰陣，追加賭局謂除咗輸家要捐拳酬之外，仲要由「哥」改名做「仔」足一個月！
為賽事戒飲酒2個幾星期嘅Andy哥自稱有信心勝出，更諗定埋贏錢會點使添！唔知好友193@ERROR會唔會嚟觀賽？有冇機會喺香港搵埋193、阿Dee再拍酒精路跑？亦抑或搵佢哋上擂台對打？想知就要睇足本訪問啦！
