【Viu】由混血名模Amanda S.、Soko San和泉素行主持嘅ViuTV全新節目《Amanda遊日取食經》即將啟播，今日佢哋現身記者會劇透內容！Soko San指其實佢同Amanda之前係同一間model公司，但都係直到呢次合作拍節目先認識，發現對方內裏係勁少女心！而Amanda就笑話Soko一嚟就派咗張半裸「閃卡」畀佢，乜玩到咁大？
講到今次嘅拍攝，Amanda同Soko話雙方嘅性格、廣東話level都好唔同，不過就出奇地夾，唔知佢哋邊個嘅廣東話好啲？Soko篤爆Amanda啲廣東話笑料，例如將「靜靜雞」講成「雞雞靜」，咁樣會唔會太爆笑？
而佢哋喺節目入面走訪京都、神戶發掘美食，Amanda自爆有艷遇！原來係佢哋有一晚去咗間猛男酒吧，Soko即刻指住Amanda笑話：「佢真係好開心！」Amanda冧爆指有位猛男用muscle整咗杯orange juice畀佢飲，用muscle榨出嚟嘅係咪會甜啲？另外，節目後半part就係佢哋返香港煮嘢食畀好朋友嘆，Amanda透露其中一位係樂基兒，想知仲有邊個即刻去睇足本訪問啦！
