【Viu】ViuTV同志真人騷《Boyscation Too》播出以嚟反應熱烈，節目主理人「池姐」Vinci王賢誌今日率領10位仔仔喺商場舉行記招，宣布將喺12月舉行兩場慈善fans meeting！第一季成員HoHo更即場除衫騷肌作預告，睇到全場都㷫烚烚！
講到節目尾段鬧出「小三風波」，Juzco被指介入Yiboh同Kendrick之間，然後Juzco喺池姐個live入面表現激動、發脾氣，池姐呢日解釋節目因太深受歡迎，唔少觀眾睇到好投入，事後嘅輿論，令當事人睇返就特別有情緒，佢私下亦有不停咁同班仔仔做心理輔導！
Juzco、Kendrick、Yiboh都表示風波後有溝通，解決當中嘅誤會就放低咗件事，Juzco亦有「經一事、蔡一智」，學會冷靜處理事情！佢同Yiboh呢pair成功配對嘅couple日前去完曼谷旅行返嚟放閃，而Kendrick亦透露現有重視嘅對象！
對節目最後只產生一對perfect match，池姐坦言係有失望，又直指開第三季嘅可能係接近0，點解呀？節目最後一集邀請到屋企人現身，池姐話聽到爸爸嗰一番說話都好感動！
而節目中未能成功配對嘅Ivan、Lori同埋Stone、Nelbon，播出至今過咗半年，佢哋之間又有冇新update？Calvin就指「票王」Jason依家心有所屬，佢自己現階段就冇一段被標籤嘅relationship，真係好玄呀！呢日surprise現身嘅HoHo被池姐爆同Tyler有段「前緣」，莫非佢哋一齊過？另外，佢哋為fans meeting準備咗啲咩surprise？快啲睇足本訪問搵答案啦！
