【Viu】大馬女神林明禎、「小龍」凌文龍合拍嘅新戲《把幸福拉近一點》，劇情係改編自一名甘迺迪氏症患者嘅真人真事，但小龍同明禎都表明電影係暖心小品，唔係話要搞到大家喊晒口、好沉重嘅，放心！
明禎自爆呢部戲係佢三年前、一開始嚟香港發展接拍嘅作品，諗番起當時真係唔識聽、唔識講廣東話都真係一大挑戰！講到戲中飾演按摩師，佢指最難係要背啲穴位，但又點會難到曾經開spa店嘅女神先得㗎！明禎更即場借小龍隻肉手開班醒幾招畀mon前嘅你，堅係機會難得！唔知喺拍嗰陣明禎有冇私人醒小龍幾吓呢？例如係按啲可以令男人變得有氣有力嘅穴位咁啦！
小龍一臉爽爆樣話聽到可以同女神拍戲之餘，仲有得享受「明禎牌」按摩，不知幾咁happy，開心到私下同女神分享埋擇偶條件添！小龍醒呀！知明禎身邊多靚女呀嘛！而講到小龍今次飾演漸凍人，佢話最大挑戰係演繹角色個心態轉變過程！佢哋覺得最深刻嘅又係邊場戲？有機會再合作嘅話，佢哋又想演邊type電影？答案竟然包含sugar daddy、sugar mami？咁好juicy喎！
