【Now.com】徐天佑太太日前指控有電影製作公司，硬闖她的護膚品店INUF拍攝，更直言「同強姦冇分別」。事件引起議論，涉事電影製作公司隨後以「認為單方陳述恐怕未能還原事實真相」為由發聲明，而INUF亦隨即出聲明逐點回應。有份主演賀歲片的張繼聰昨日（24日）出席電影《裡應外合》首映禮受訪時指，承認當日他與蔡卓妍（阿Sa）身在現場但不知情，坦言身處位置極尷尬，但認為：「任何硬闖拍攝都唔應該。」
張繼聰昨晚（24日）出席有份演出的電影《裡應外合》首映禮，他接受傳媒訪問時回應有關風波，承認當日他與蔡卓妍正是進入店內拍攝的演員。他憶述當日是第一日為該電影開工：「其實嗰日係我第一日拍，當時我同阿Sa花咗好多時間去討論點樣拍，咁所以拍嘅時候我係唔知場地嘅問題，因為演員從來都唔會問製片呢度拍唔拍得，嗰度拍唔拍得。咁所以拍嘅時候話拍，咪就入去拍囉。而我入去拍嘅時候都有同職員打招呼。因為嗰個美容院我都有做過Facial。到一路拍嘅時候都冇嘢，到夜晚嘅時候就知道網上就有呢個Po。」
張繼聰又直言現時身處位置尷尬，對於變磨心感無奈：「我諗任何硬闖拍攝都唔應該。我作為一個演員好難問電影公司，我哋係咪硬闖。其實件事發生咗之後，多咗好多人討論呢件事，變咗我就夾喺中間，而另外嗰邊都係我朋友，亦都唔了解成件事，坦白講，如果我一早知係咁，就唔會發生。你話呢件事係咪有人處理得唔好，我覺得呢個人係要自己處理返。」被問及事後有否與徐天佑聯絡，張繼聰指二人有短訊聯絡，但認為事件非二人可處理，因店舖屬徐天佑太太。
他又承認情緒有受事件影響，事後亦有看網上評論：「作為一個演員，呢件事唔容易，如果你係我，遇到呢啲情況，都係要繼續畀心機拍。幾難行都繼續拍啦，演員冇得控制，希望呢啲事唔好再發生，係一啲可以避免嘅事，程序上做好啲就唔好再發生。」
Photo／Facebook@INUF、Viu1HK
