【Viu】森美、ANSONBEAN同李亞男今日出席嘉年華記者會，森美自認keep得好，身形十年如一日，只係依家嘅髮量要梳「孔劉頭」。森美又親自還原「大阪7街瞓驚魂記」，笑言因為冇帶羽毛球拍，所以老婆唔肯陪自己住時鐘酒店，仲話已經收到中介網站嘅賠償，覺得合理同滿意。
講到梁思浩指佢博宣傳，森美坦言冇諗過用呢個方法，亦唔知公司設有「投票加人工機制」，慶幸自己不嬲有人工加，亦唔介意同思浩合作，笑指可惜今次住嘅酒店冇撞鬼，冇得上節目分享。
至於日前喺903排球賽show quali，森美謙稱自己只係評述叻，Ian先係打得勁，加埋AL同Jeremy，簡直好似睇緊漫畫咁靚呀！
此外，ANSONBEAN表示聖誕會帶家人同女友張天穎去嘉年華，但一講起女友就面紅耳熱，認真搞笑！對於Stephy加盟其唱片公司，Bean Bean就話想同「師妹」出跳唱歌，咦，小編希望係《跑online》曲風喎！
