【Viu】馮允謙一連三場紅館個唱已順利完成兩場，第一場嘉賓請嚟COLLAR成員Marf，佢著住大露背、低胸裝同Jay合唱《All That I Want》，Jay笑住話：「其實我哋出咗隻歌，就係頭先唱嘅《All That I Want》，今日係第一次唱Live Version！」Jay表示《全民造星IV》時已好欣賞Marf，讚佢唱得又跳得，仲笑話自己係被迫跳舞，少少尷尬又可愛！
第二場就有Janice衛蘭坐陣做表演嘉賓，「雙J」合唱英文歌《Like I’m Gonna Lose You》之後，Jay說：「Janice對我嘅音樂路向好重要，因為未入行時我喺加拿大，睇電視見到一個女仔喺遊戲節目裏面唱歌。嘩，呢個女仔唱歌咁好聽嘅！後來知道佢好似我咁鍾意R&B，又好似我咁睇中文要睇拼音，我叫『火星文』，當時希望有一日可以同呢個女仔同台唱歌。」
Jay同Janice互相欣賞，佢哋喺3年前一齊做過騷，Jay仲有一個想法：「下一次如果開紅館或者有一個大舞台，我好想同你一齊share，because I love you so much！」 Janice接住話：「I’m so proud of you！我覺得你嘅聲音喺呢一行係好獨特。No one can sing like you，right？」Janice講完之後，全場送上熱烈掌聲呢！
呢兩場嚟捧場藝人朋友都唔少，頭場除咗有Jay的父母、兄弟與未婚妻Crystal等家人外，圈中好友仲有鄭伊健、梁釗峰、Me&成員黃淑蔓和連家穎、「Jay女郎」劉沛蘅和徐㴓喬、ANSONBEAN及女友張天穎、吳浩康和胡鴻鈞等，而第二場就有陳健安、Amy Lo盧慧敏、Cloud雲浩影、岑寧兒、陳詠謙同AGA等，非常熱鬧。
