【Viu】香港兩大神級笑匠Michael許冠文及黃子華，繼電影《神算》後，相隔32年再次喺銀幕上合作主演《破·地獄》！呢次佢哋唔再搞笑，喺戲中飾演一對性格南轅北轍的殯儀業拍檔，當中有場關鍵嘅感人剖白戲更係二人嘅演技大對決，就連女主角衛詩雅同有份演出嘅秦沛都專程嚟欣賞！
劇情講述子華神要向Michael剖白做禮儀師原委，當佢講到動情之處，難掩激動哽咽，一cut機即刻行埋一邊拭淚，平復心情後迅速埋位繼續拍攝，非常專業！之後二人以一曲泯恩仇，仲破天荒合唱南音，唱到最後一句時，子華神唔記得歌詞笑咗出嚟，又搞笑「投訴」坐嘅位係睇唔到貓紙唔公平！
Michael為演活喃嘸師傅角色，開拍前特意拜師學習二胡、南音演唱，respect！Michael自爆父母由細到大都係唱南音，唱開英文歌嘅佢就覺得好老土，但喺呢次接觸南音後，有另種一體會，又講到特別喺疫情後再細味歌詞係寧捨有意義，講講吓Michael仲即場「露兩手」唱咗幾句添！至於談及同子華神再合作，Michael感慨萬千，原來佢哋喺《神算》嗰陣就相約有機會再合拍一部喜劇，Michael話發夢都估唔到要喺咁耐之後！
另一邊廂嘅子華神就大讚Michael sharp過以前：「基本上呢次見番佢係冇變過，所有嘅速度、嗰種嘅所謂sharpness，尖銳真係一針見血！基本上，佢嘅judgment係絕對信得過，佢講過嘅說話真係要睇重！」
