【Viu】《美麗40路最美一夜》今日進行錄影，黃智雯離開大台後首度現身ViuTV，孖住方皓玟同《造星V》冠軍Lyman齊齊做評判。智雯初訪ViuTV感覺新鮮，好開心見到舊同事孫慧雪，亦放風想同Lyman合作拍劇，有品味呀！Lyman就話今次攞正牌「睇女」，但講完心水佳麗後即刻補鑊話：「我好愛我老婆㗎！」
至於強尼透露會任泳裝環節主持，似成就解鎖，笑言之前啲Cap圖都用咗幾年，係時候畀啲新Cap圖網友轉發喇！七師傅就同Brian陳安立拍住上做嘉賓，當師傅自爆選美係「睇下面」嗰陣，Brian即刻更正係臀部，笑爆全場！問到七師傅點睇Edan追林明禎一事，佢就繼續暴走，聽到強尼同Brian一額汗呀！
此外，陳俞希、黃心美、孫慧雪同劉明軒坦言唔捨得一眾參賽者，仲齊齊為心美嘅主持技巧平反添！想知就睇足本訪問啦！
