【Now.com】華為啱啱發表全球首部三折疊屏手機HUAWEI Mate XT，小編雖然唔喺會場，但一直睇住網上直播，即時為 Now.com WATCH觀眾及讀者，帶來最新消息。事不宜遲，即睇重點。發布會由余承東親自做presentation，介紹呢部新機，部機將於9月20日上市，同凌晨發布嘅iPhone 16同日正面交量。
HUAWEI Mate XT唔打開時，同一般手機用途無大分別，廠方形容「便捷從容」，有需要時就可以打開一折，實現「高效瀏覽」，完全打開後就會變成一部10.2寸 tablet，而且機身超薄，只有3.6 mm，享受「沉浸閱讀」。
可以整到咁薄，華為指因為用咗天工鉸鏈系統，26個精密凸輪，鉸鏈用上「超強火箭鋼」，單係個名已經好勁！屏幕材料有多向彎折柔性特質，可以應付外折抗拉伸，內折抗擠壓。
電池方面，塊電厚度只有1.9 mm，係全球最薄硅負極大容量電池，因為用盡空間，所以有整部機電池容量有5,600 mAh，支援60W快速充電。至於相機鏡頭，後置3鏡頭相機，包括5000萬像素主鏡、1200萬像素超廣角鏡、1200萬像素潛望式長焦鏡。主鏡有10檔可變光圈，相片質素令人期待。
大家最關心嘅價錢，HUAWEI Mate XT 16GB+256GB價錢19,999人民幣，16GB+512GB價錢21,999人民幣，16GB+1TB價錢23,999人民幣，9月20日與iPhone 16同日發售。暫未知香港會唔會推出，以及賣幾錢。
Photo / HUAWEI
