【Viu】Aaron郭富城總共13場紅館騷《郭富城ICONIC世界巡迴演唱會2024香港站》，今晚尾場！愛妻方媛繼續帶同一對寶貝囡Chantelle、Charlotte，仲有方爸爸、方媽媽嚟捧場，佢哋現身嗰個moment引起現場一陣騷動！
尾場唱多啲歌是常識吧！換上一身透薄Deep V白裇衫嘅城城獻唱金曲《狂野之城》，唱到中段hot爆起勢咁自摸腹肌，之後又係咁拉起件白裇衫引誘fans，加埋佢個chok爆笑容，睇到台下fans熱血沸騰，起哄良久！
唱到下一首《錯愛的呼喚》嗰陣，城城更將福利level up，索性解開白裇衫啲鈕，嚟個爆肌body放題，全場放聲尖叫超震撼！事後城城謙稱冇特別為呢個騷去操肌，但竟然都有呢一身「成果」，真係好令人葡萄囉！
城城隨後換上一套bling bling機械人裝，同時身後大螢幕有個AI機械人城城，兩個「城城」都型到裂！之後再次化身「國王AK」，喺「城堡」熱唱《一變傾城》，唱到第13場仍然都係keep住靚聲，城城世一！另外，尾場嚟睇騷嘅嘉賓有張可頤、李蕙敏、關寶慧、戚黛黛、黎燕珊、林海峰、俞琤及胡楓等。
