【Viu】張繼聰、Bosco黃宗澤、陶大宇、周勵淇等今日喺荃灣出席新片《紥職3》首映，今次係系列中全新故事，但Bosco、阿聰同陳家樂依然係打死不離三兄弟，跟Mark鄭浩南一齊對抗陶大宇，將展開一場江湖大廝殺。早前被姜濤讚係「最佳前輩」嘅阿聰，笑言「使咗唔少錢」，仲爆Mark哥收工後會著超短熱褲，型到裂嘅打扮連阿聰同Bosco兩位「後輩」都自愧不如，carry唔到，阿聰笑言：「我係仔都覺得好正呀，但如果我著，人哋可能會覺得難受囉。」
對於被Edan暗寸「屎波」，阿聰即Post對方射失波片段作還擊，佢話大家私下好熟，Edan又玩得，打波互笑都好正常。而吳卓羲最近傳跟菊梓喬分手，女方戀上保錡，Bosco透露昨晚跟卓羲食飯完全冇異樣，笑晒口反問：「乜一齊過咩？」真係好兄弟呀！
至於周勵淇戲中將會同Bosco有感情瓜葛，自覺最大作用就係中和返「男性荷爾蒙」過盛，而新加入嘅大宇就叫自己做「新人」。兩位不約而同都係處女座8月底生日，61歲嘅大宇分享生日願望，至於票房理想會唔會派福利？想知就要睇片！
