【Viu】Aaron郭富城共13場的《郭富城ICONIC世界巡迴演唱會2024香港站》，今晚喺紅館開鑼！愛妻方媛同一對寶貝囡Chantelle、Charlotte當然有嚟捧場，仲有外父同外母添，so sweet！
以一頭金毛攣髮配花花look嘅城城，喺台中大型裝置「iconic 凱旋門」中升起登場！一嚟就跳唱新歌《Exit》炒熱紅館氣氛！唱完就原地quick change，城城邊除去西裝外套，邊同台下fans打招呼，佢表示事隔8年終於可以重返呢個殿堂級舞台，又耍冧功話好掛住大家！城城又爆最初嘅演唱會名係「ICONIC EXIT」，最後點解又唔用呢？
個唱去到中段，城城帶嚟連串失戀歌，當中包括《雨中感嘆號》，佢話呢首歌係勁多fans要求佢唱，真係超寵粉！之後城城又帶大家參觀佢個「AK皇宮」，巨型LED MON一開二分開，現場睇勁震撼！而「國王」城城早就坐喺凌空嘅皇位，chok到爆咁跳唱《國王的新歌》 ！
疫情中迷上書法嘅城城，喺個唱尾段展示30幅「您」字嘅字畫，以感謝fans支持咗佢30年！唔止有字畫，城城又守承諾為fans作首歌，頭場首唱《您》！另外，是夜嚟睇騷嘅嘉賓仲有張智霖同老婆袁詠儀、蔡一智孖老婆、阿占一家三口、溫碧霞孖老公何祖光同囝囝，同埋鄭丹瑞等。
