【Viu】Ivy So@COLLAR同麗英今日現身《反轉腦朋友2》謝票場，適逢今日係Ivy嘅23歲生日，「蘇蝦」一早到場舉牌，工作人員推出「阿樂」生日蛋糕，仲全場大合唱生日歌，有fans大叫「食肥燶叉」，氹到壽星女勁開心。
又大一歲，Ivy自覺依然好青春，透露噚晚同COLLAR一班姊妹食咗個好味生日蛋糕，今日就會去fans應援度打卡。講到生日禮物，除收到fans送嘅原粒榴連，仲有細佬贈魚夫帽。講起細佬，佢仲突然幫手做紅娘，透露細佬唔靚仔，又生得唔高大，跟身旁嘅麗英好相襯；雖然細佬係Day嘅fans，麗英聽見即笑認自己同Day有幾分相似，即場叫聲Ivy做「大姑奶」，笑cry呀！
Ivy亦有留意 「蘇雅琳沙灘小背心」呢個Po，笑言希望去沙灘着一次，可惜最近真係太忙。除咗要不停開工，早前仲抽時間去學踢波，同武打動作，爆「四仔」張文傑平時係「龍捲風」咁嘅坐姿，見有錯就會出手提點，開心獲對方提攜，希望真係有機會拍《九龍城寨之圍城》三部曲。練習期間試過吊威也受傷，Ivy話一啲都唔怕，有打拳嘅麗英都話想試，Ivy竟唔小心爆咗句：「未試過去咁高地方。」生日大晒呀，麗英當然唔會嬲豬，Ivy即轉channel讚麗英新歌勁好聽，兩位情緒專員戲裏戲外都咁爆笑，記得要睇足本訪問。
