【viu】193郭嘉駿今日現身奧運直播活動，193喺台上打籃球、教跳《404》新舞步外，仲獻唱冧歌《再見Puppy Love》。咦，呢首歌咪係由明禎BB做MV女主角架囉，33笑言係為Edan同林明禎而選，自己好耐冇見明禎BB，唯有「睹歌思人」。
193自認怕羞仔，實情連明禎電話都冇，仲即場「大」Edan，用激將法話如果講大話唔追明禎BB，就「正廢柴、垃圾、衰仔」。對於Edan同明禎喺荷蘭約會撐枱腳相片流出， 193覺得好唔對板，笑Edan既係香港頂流，竟然帶明禎BB去食普通嘢，無論係咪溝，第一次約女仔食飯都應該去高級餐廳，愛情專家上身咁款。
不過笑完一輪，33都有為兄弟解畫，覺得同朋友食飯唔係男就係女，大家真係唔好存有太多幻想，私心mode希望將來自己被人影到，大家都明白可能係普通朋友食餐飯。
而最近經常通宵睇奧運，亦挑起193打籃球嗰團火，佢透露手骹骨有20% 磨損，但係依然打返籃球，並爭取喺嚟緊奧運籃球總決賽時做客席主持。另外，193仲有好消息宣布，ERROR嚟緊除咗會出新歌，仲會衝出香港拍團綜，癲到咩程度？就等193親自分享啦，去片！
