【Viu】Ashley林愷鈴、Nancy歸綽嶢、kayan9896吳家忻、陳漢娜、張蔓莎、Martin王智騫、Kenji范麒智，今日着靚靚出席品牌活動！講到Ashley噚晚去睇Ian@MIRROR亞博騷，佢難掩興奮、紅都面晒咁大叫「好好睇」，又大讚陳仔呢位音樂總監編排得好好！Ashley更化身Hellosss不停執紙碎，唔知佢執唔執到最新款嘅黃色花花，儲到一套呢？
睇到Ian爆肌look，Ashley搞笑話忍唔住「嘩」出聲！佢指睇完個騷，即刻有好多創作靈感，鞭策到佢練多啲琴！咁啱同場坐佢隔籬嘅係佘詩曼，Ashley繼續keep住個hyper mode話有同阿佘集郵，睇騷期間仲一齊大合唱添！
Nancy話見到韓星惠利@Girl’s Day心情興奮，平時都有睇對方嘅綜藝，今日見到真人驚歎好靚！佢預告新歌《Let go》MV今晚上架，指係專登飛台灣拍攝，MV男主角係之前合作過嘅添！另外，Chill Club音樂會下星期三晚舉行，大表波Stanley講過話想同Nancy crossover，唔知佢哋係咪真係拍住上表演？Nancy又爆咗啲內幕？提起大表波即刻勁怕醜，唔通Nancy鍾情肌肉男？足本訪問片ready！
