【Viu】生日快樂！今日喺Anson Lo盧瀚霆29歲生日，盧瀚霆國際後援會真係好有心思，為教主搞咗海陸空全方位慶祝活動！
中午時份，教主就現身尖沙咀一間酒店出席歌迷會準備生日Party，一連兩場有成2000位神徒到賀。席間，教主同神徒大玩遊戲，寵粉嘅佢即席向神徒示愛：「BB豬！」。有來自世界各地嘅神徒拍片向教主賀壽，而教父、教母同教姐亦驚喜送上親手寫嘅「家書」，搞到教主眼濕濕。Fans向壽星送上「My Life」翅膀造型生日蛋糕，佢表現得勁興奮，仲搞笑話想帶對翅膀返屋企添！壽星撈提到今年生日願望，佢希望神徒同家人都身體健康，因為大個咗知道健康嘅重要，又透露今晚會同屋企人一齊砌蛋糕慶祝。
而小編都一早出發連走多個打卡點，同各位神徒一齊感受「教主誕」嘅熱鬧氣氛！第一站去到又一城《Anson Lo & Sontos - SoaR Pop Up Store》，澳門神徒Snow一早坐船嚟香港，仲帶備MIRROR演唱會上穿着嘅閃石戰衣公仔，準備去齊咁多個應援點打卡。睇咗《大叔的愛》入坑嘅Sandra就最鍾意壽星撈親筆寫嘅家書，提起撈撈早前要body check，佢就好心痛，祝願教主一定要保重身體！
第二站去坐免費往來尖沙咀同灣仔嘅天星小輪，今年已經係連續3年免費請全港巿民搭船啦，呢度有來自台灣嘅海氏一家三口，媽咪天天最鍾意睇教主有份演出嘅劇集學廣東話，佢話老公冇呷醋，同囝囝一同被感染愛上教主，大愛呀！
除咗FC，Little Giants亦有舉辦應援活動，邀請全港市民去中環免費乘坐摩天輪，有特別版門票派發，除咗有神徒派發應援物，仲有架黑色好cool嘅應援van仔，真係行到邊都可以打卡同撈撈影返張靚相。
夜晚仲有壓軸慶祝活動，喺西九欣賞以「SoaR」作主題嘅無人機匯演，記得早啲拎定櫈仔去霸個靚位嘞！想一氣呵成睇教主應援即去片。
