【Vu】教主Anson Lo下個月7號就係29歲生日啦！盧瀚霆國際後援會今年以「SoaR（翱翔）」做主題，喺商場舉行生日慈善應援pop up store，今日開始展出，即刻帶大家行個靚圈先！
一入場先見到個大型心形佈置喺中間，神徒可以去整專屬愛心鎖扣喺上面，成件事sweet到爆！之後就會見到教主喺演唱會上唱《MY LIFE》嘅Bling Bling戰衣，行過啲就會見到教主喺MIRROR世界巡唱期間影嘅即影即有，chok、萌、型、放電、嘟嘴，要咩pose都有！另外仲有《深閨》MV打卡位、同撈撈隔空合照、生日周邊紀念品、最後當然唔少得家書！想知教主今年有咩說話同神徒講，就要睇片啦！
現場有唔少小神徒，「前夫」阿進專登帶埋兩位囡囡綽蕎、愷玥嚟朝聖，佢哋話同撈撈慶祝咗3年生日，阿進指全家都鍾意Anson Lo，最佳嘅親子活動就係齊齊追星！綽蕎、愷玥興奮話曾經同Anson Lo合照，冧話撈撈好香，更直言同撈撈合照開心過同爸爸影相！爸爸聽到囡囡s咁講又點睇先？佢哋仲齊齊合唱《深閨》，會唔會太cute？至於小神徒Helly、Karel就分別大跳Anson Lo嘅《Megahit》、《MY LIFE》，佢哋表示受教主影響而去學跳舞㗎！Respect！
