【viu】馮素波、葛民輝、林耀聲今日喺香港藝術中心出席虐老短片《垃圾》首映，阿葛同阿聲一白一黑現身， 竟然搞到啱啱做完激光矯視嘅波姐頭暈暈，差啲當阿聲喺幅牆撞埋去，場面爆笑。但無損波姐靚靚心情，皆因電影早前揚威海外，喺法國康城影展贏得「最佳銀髮影片」、「最佳人道主義影片」及「最佳女演員（短片）」，波姐話獎座份量十足，因為夠晒重呀！葛民輝則獲美國洛杉磯獨立短片獎頒發「最佳男配角」銀獎，可喜可賀。
原來波姐一開始唔知道電影會參展，獲獎當然喜出望外，阿葛笑指接拍呢部電影好似做「義工」，暗示酬勞偏低，仲有虐老之嫌。波姐除咗要被飾演阿仔嘅林耀聲虐打，幾位演員仲要通宵3日3夜拍攝，波姐更為拍一個鏡頭，搞到要成為最後一個收工，認真陰公豬。
另外，軟硬天師剛宣布8月舉行拉闊音樂會，阿葛一朝就畀朋友追飛債，笑言心情就好似今朝一場暴雨，滴晒汗呀！估唔到連波姐都想要飛，指屋企好多第二代：「起碼4張。」阿葛笑指波姐「坐地起飛」由1變4：「如果我代理嘅話，一行啦，打橫架！」有阿葛就有搞笑失控場面，想睇更多快啲睇片！
