【Viu】ViuTV新節目《神之調酒師》今日端午節舉行記者會，出名飲得嘅娟姐練美娟、余迪偉同著名酒評人黃詩詩就分別擔任主持同評審。節目打正旗號飲酒，娟姐話唔好針對佢，其實唔係成日醉。
而詩詩就最豪，喺其中一集上郵輪拍嘅外景，帶咗超多珍藏靚酒俾大家Free Flow。爆料停不了，迪偉話有人酒後亂性，娟姐反叫佢垃圾，醉到連慶功都去唔到，酒量係3人中最屎。佢哋仲互相調換性別添，笑C呀！
講到靚仔調酒師，不嬲膽生毛嘅娟姐都話唔夠膽一個人去外地酒吧識仔仔，又話熄咗燈個個都靚。詩詩就最誠實，會為咗靚仔幫襯。
而節目中32位調酒師會以淘汰制形式比賽，其中4位大熱選手包括Eartha、Lok、Nic同Lydia都表示信心十足，佢哋都話好少醉到斷片，反而調酒年資係零嘅Nic因本身係做釀酒，醉係基本。睇完龍舟就入嚟睇吓足本訪問笑吓啦！
