【viu】《三叔公園》三位主持余迪偉、「灘叔」鄒凱光、「阿Bu」姚家豪，由網台走到上麥花臣舞台，「破處」開talk show《壞-ology》，更係連開5場！是夜頭場一開騷三位叔叔先嚟變魔術，由阿Bu做劊子手、「食蕉」灘叔做副手上演「刀鋸壞人」，自認喺三位中最壞嘅余迪偉就自薦被鋸，場面超驚險！
之後三子分開3 part solo，喺「邦會會長」灘叔大談打工仔奴性重言論嗰陣，余迪偉戴長假髮、着高衩露黑打底長裙，扮女同事「Holiday」，笑死全場「園賓」！
輪到阿Bu就詳談婚姻主題，講到兩年前同利君牙結婚撞疫情冇擺酒，令佢一直耿耿於懷，趁呢次開talk show話要補送返份「大禮」畀老婆，sweet到爆呀！仲有神秘嘉賓登場添！最後三子感人獻唱《冇㗎喇 冇㗎喇》，余迪偉更唱到眼濕濕用紙巾拭淚！
