【viu】張敬軒久未現身公開場合，今日佢出席品牌活動，過百「澱粉」出動見偶像，全場同時尖叫勁誇張！軒公透露最近密密拍廣告，同「孖生兄弟」林家謙最新出嗰個都只係頭炮，又抵死笑家謙轉咗look完全唔認得，變wild咗，令人有更多遐想喎！
Tyson Yoshi今朝宣布求婚成功，軒公自爆一早知情，事關Tyson作完首求婚歌有畀軒公聽，軒公更化身「張師傅」幫佢算算求婚成功機率，但唔使算都知實得米啦！軒公仲分享咗呢倆口子私下嘅冧事，又講埋會準備咩賀禮送一對新人添！
身為大師兄嘅軒公，被爆借出豪宅予女團師妹VIVA作女生宿舍，佢直言間屋係發跡屋，好「老黎」㗎！更講到明會隨時突擊檢查師妹s有冇整爛佢間屋，會唔會就係派「降兩度」重出江湖完成呢個「重任」？軒公又點大方回應有市民去信超級市場，要求唔再播佢嘅歌？
同場仲有Will柯煒林、胡子彤，呢對bro一孖住做訪問就一發不可收拾，Will搞笑做part time記者追問胡子彤噚日同Locker、Marf、Ivy So睇世界盃外圍賽一事，真係笑爆嘴！Tony BB緊張話係約咗Locker，但唔知對方會再帶朋友去睇波，答到出晒汗咁！近日Will現身康城影展宣傳電影《破浪男女》，期間遇上名導是枝裕和，即刻求合照！講到同為主演嘅吳慷仁戲中超多激爆情慾戲，Will劇透佢嗰part都唔弱，意識上係佢從影以嚟最大，極有可觀性添！
仲有泰國男神Mew，呢次佢只係快閃一日嚟香港見fans，一嚟就賣口乖話好掛住大家！講到上年有嚟香港玩，去咗車公廟拜神，佢笑話願望有成真！期待之後可以嚟香港拍動作片同開fans meeting！
