【viu】電影《談判專家》今晚舉行群星首映禮，劉青雲、吳鎮宇、苗僑偉、鄭則仕、韋羅莎、周文健、盧惠光、洪天明、袁富華、顏卓靈等齊齊現身，場面熱鬧！吳鎮宇嘅16歲仔Feynman激罕現身撐場，大個仔同爸爸一樣咁高大呀！
兩大影帝青雲、鎮宇事隔19年再拍住上主演電影，佢哋話感覺似以前一齊開工咁，會唔會係因為知道對方接拍先應承演出？呢個moment佢哋大晒默契，爆笑話唔係，一個話：「要開飯㗎！」，另一個就話：「你估我出面好多嘢撈？」真係笑死人！而鎮宇就期待電影有續集，咁佢就可以飾演人質啦！
講到近年香港電影票房屢創佳績，呢兩位影帝都幽默話：「希望唔好畀我哋拉低番！」咁謝票嗰陣會使出咩法寶先？青雲即刻推舉老友鎮宇唱歌，吳生又制唔制？佢仲講笑話某啲item要收錢先做，又係啲咩？
而鎮宇日前接受Do姐訪問，爆Feynman大個想做導演，呢日佢笑囝囝係亂噏，仲話唔鼓勵讀導演，點解呢？之前Feynman又成日喺社交平台出post整蠱爸爸，青雲就抵死笑嘲：「虎父無犬子！」鎮宇都有認衰呀！
