【viu】薛家燕今日出席保健產品活動，同老友記分享養生之道，席間自爆試過叫錯3個仔女名，連3歲孫仔都學佢嗌大姑姐做「珊珊」，巧打耳呀！家燕姐透露稍後會去馬來西亞拍電影，飾演特務，笑言要搵「王九」伍允龍訓練武功，識玩喎！雖然新片有小鮮肉同場，但家燕姐謝絕拍親熱戲，唔想好似「何伯、河馬」咁Open，仲講笑話：「越嚟越三級喎！太放喇！收歛啲啦！」
另外，講到合作多年嘅顏國樑病逝，家燕姐即時眼紅紅指最後一次見老拍檔係舊年做訪問時，大讚佢係積極樂觀嘅生命鬥士，希望顏太節哀順變。至於盛傳蕭亮喺加拿大離世，但一直未有人證實，家燕姐都求證唔到真偽，但依然好懷念蕭亮嘅「攝石」功力。
