【Viu】杜德偉《Get Up起來》世界巡迴演唱會台北站，昨晚（18日）喺台北小巨蛋順利舉行，Alex畀咗台灣樂迷一個驚喜，透過聲音讓已離世嘅爸爸、上世紀60年代鼓王兼音樂歌唱家杜奧利，跟兒子AJ嚟一場跨時空接觸，祖孫從未有過接觸，AJ對爺爺嘅印象只能留於舊照片，三代同台隔空合唱英文歌《Wonderful world》，場面窩心感人。7歲嘅AJ表演淡定，表演後鬼馬表示：「謝謝大家來到我爸爸的演唱會。」全場大笑。
當然唔少得《脫掉》呢首經典歌，唔經唔覺已面世20周年，Alex特意重新打造2024年全新版，舞者服飾、以至編曲全部重新包裝，台下觀眾聽前奏即情緒高漲，應Alex號召紛紛起立歡呼，捧場嘅一班好友亦被感染，一齊聞歌起舞。
完騷後，Alex跟團隊一齊去慶功，仲準備咗驚喜俾梁家輝夫婦，送上兩個Cake慶祝佢哋結婚周年紀念，以及梁太江嘉年生日。另外，跟Alex相識30年嘅林志穎，因為開騷當晚未能親自捧場，故特意早一早探班，非常有心送贈鮮花到場，最後小志更跟AJ一齊為Alex按摩，相當鬼馬。
