【Viu】天王郭富城連續第三年擔任香港麥當勞環保大使，今日為屯門市廣場全新綠色主題餐廳揭幕，宣揚「齊齊為地球 麥麥行多步」，又再一次同Baby Shark合作拍宣傳短片，城城話超high呀！佢指同時可以作為一對囡囡嘅榜樣，以身作則教佢哋環保訊息，而城城嘅環保tips就係自備咖啡杯啦！
講到囡囡喺啱啱嘅母親節，畫咗張母親節咭送俾方媛，城城冧指大寶、二寶遺傳到佢嘅藝術細胞，可能又加上喺疫情嗰陣佢喺屋企練書法，從而令到囡囡對藝術產生興趣！
談及方媛近日被網民野生捕獲喺餐廳食飯，素顏之下顯疲倦兼水腫、鼻大，疑似係陀B樣，莫非有喜訊公布？城城回應指連佢自己都唔知情，一直以嚟都係順其自然，不過見到張相就好心痛太太，感謝佢相夫教子又要處理繁忙私事，承諾完成手頭上嘅巡唱、工作，就飛去一個天涯海角、海枯石爛嘅地方旅行，聽到真係sweet到爆呀！
