【Viu】「修修」胡楓喺嚟緊星期六（18日）首次去澳門開騷，今日就同其中幾位嘉賓綵排，包括有好友羅蘭、張繼聰、蘇永康，一齊合唱《朋友》！期間張繼聰突變「張三歲」，邊唱邊耍寶，又喺影合照環節教羅蘭姐派心心，攞晒啲心肝脾肺腎腸出嚟，係咪想笑死人？
修修呢次以92歲之齡開騷係破咗亞洲紀錄，佢揚言要破埋95歲開騷呢個健力士紀錄，respect！上次修修開紅館騷有草蜢、黃子華臨時上台，佢笑話呢次可能都會有特別嘉賓，而契仔張家輝呢次亦係on嘉賓list！
阿聰指今次獲修修邀請做嘉賓超開心，因為見平時修修請得嘅都係天王巨星，今次有份上台，係事業踏入人生嘅另一階段！講到同修修嘅緣份，阿聰話曾合作拍電視劇、電影，喺修修身上學習養生、做人態度、性格等，更指對方係佢揸電單車嘅啟蒙老師，甚至係救命恩人添！佢笑話今次上台唔會跳舞，驚喺「舞王修」前自取其辱！另外，阿聰透露正為新戲角色再操肌，貼心預告遲吓操成會隨時隨地除衫，咁癢眼咩？睇足本訪問片小心笑到有腹肌！
