【Viu】《ANSON KONG ‘’THE GAME OF LIFE’‘ IN MY SIGHT SOLO CONCERT 2024》詳情今日記招揭盅，生粉一早standby企滿商場4層樓！Anson Kong將喺7月29日假亞博Arena開騷，演唱會poster更喺呢日首度曝光，上面有超多個型爆AK分身之餘，另一亮點就落喺右下角，係愛犬猜柴呀！
AK話公布咗solo concert日期就開始有啲緊張，之前個感覺都係唔係咁真實！又指完埋MIRROR尾站澳門巡唱後，就會開行turbo籌備個人騷，首要做嘅就係操體能，預告個唱將會係佢入行以嚟跳得最多嘅一次，依家就瘦得滯，希望同差10吋胸肌嘅大表波睇齊，更承諾做得到嘅話就會脫，等你呀！
呢日老闆仲透露接住落嚟會出多兩首有份參與創作嘅新歌，會喺solo concert先首唱？嘉賓方面，AK喺台上宣布3個可能性，莫非等於有3個嘉賓？猜柴有冇機會上台？AK笑話如果猜柴做嘉賓，會唔會成首個喺台上執屎嘅歌手？另外，solo concert暫定一場，有冇機會加場？九展將拆卸感受？由AK哥哥主理嘅拉麵店宣布結業回應？即刻去足本訪問片！
