【viu】193郭嘉駿@ERROR近日接受商台節目《星光背後》訪問，重提當年參加《全民造星》時被指冇準備：「當時乜都唔識，我入去係諗住畀人教我，然後成長，點知一嚟就叫我表演。但踏出咗第一步就唔想放棄，無論自己幾廢都好，嗰幾個月我真係每日都練！」成功躋身99強後，193坦言嗰100萬獎金都係望梅止渴，「我第一日見到姜濤，已經望住佢個樣，仲點望嗰100萬？大佬，佢喺個比賽入面唔係人嚟，咁Outstanding，點可以贏到佢？」
曾沾沾年少拍拖經驗豐富嘅193，卻罕談入行後嘅戀情：「我認我拍拖都唔會公開，驚公開咗之後，會影響到人哋，萬一同佢分咗手，佢可能會難咗識男仔，或者被標籤成『193前女友』，因為我都唔係咩好人。」3爺又大方認爆紅後囂張失言搞到失埋Job：「去到《ERROR自肥企画》爆咗出嚟先真係紅，我睇返張糧單，都真係嚇親自己！嗰一排做廣告從業員真係多，但只係維持咗幾個月，然後我就講錯嘢，廣告商就唔見晒，半年都冇人搵過我！嗰陣真係沖昏頭腦，之前一直冇人理，突然之間咁多廣告商，明明前一日仲笑緊我，下一日就無啦啦同我鞠晒躬，嗰陣覺得好威、全香港最紅係我！」其實直率性格都係3爺嘅優點之一，想聽吓佢講經，入嚟睇片啦！
