【Viu】姜濤,生日快樂!今日係430姜濤誕嘅大日子,姜濤香港後援會今日繼續舉辦《430 姜濤生日 電車免費乘車日》,數十名幸運姜糖朝早登上「姜濤號」暢遊港島,沿途大唱生日歌,祝賀姜Admin 25歲生日。當「姜濤號」駛入「姜濤灣」嗰陣,電車路兩旁企滿姜糖,迫爆姜濤灣,萬人空巷呀!
最神奇係原本落緊微微雨,但當「姜濤號」一入到「姜濤灣」就放晴,同上次海洋公園生日Party一樣,姜Admin似乎有潛質做「太陽之子」喎!而「姜濤灣」各個打卡點都佈滿打卡嘅「姜家人」,Happy Keung To’s Day!
鏡頭一轉嚟到尖沙咀商場!FC喺「430」呢日額外準備咗份生日禮物送畀姜Admin,就係喺商場戶外大電視狂loop住姜姜靚仔片,仲有小濤濤Figure公仔同4款小濤濤銅幣出售,現場仲「野生捕獲」4歲半嘅「小姜糖」芊潼,cute爆唱《蒙著嘴說愛你》向姜Admin告白,一直恨生女嘅姜濤一定開心仔咯!
至於壽星姜噚晚就喺限時動態倒數24歲嘅最後3小時,仲贈送運動後嘅鬚根Look,今朝晨咁就去跑步,相信大家都見到姜Man Fit咗好多啦!
現場實況:直擊430姜濤誕 姜濤鬚根Look倒數24 晨跑迎25 MIRROR齊慶生 「姜濤號」駛入「姜濤灣」萬人空巷 姜家人走匀港九慶祝 冧讚壽星仔好得太過份