【viu】泰國男神Win Metawin 最近密密嚟香港搵銀，佢今日又喺銅鑼灣出席品牌活動，快閃香港一日就走，佢話好鍾意嚟香港玩同食嘢，尤其燒味飯，如果介紹朋友嚟打咭，會推薦主題樂園，可惜呢幾次嚟都冇機會去，對上一次去玩已經係成十年前啦！
同場仲有閨密姊妹花Jennifer 余香凝同Fish廖子妤，佢兩個分別喺今屆金像獎入圍影后同女配，Jennifer已經準備好戰衣，但唔會因此節食，聽日仲要約Fish補食生日飯添！Fish呢兩日要fitting，笑言唔只會露新紋身小狐狸，更加係咩都露！Fish有份主演ViuTV電視劇《瑪嘉烈與大衛系列 絲絲》今晚大結局，佢話好唔捨得瑪嘉烈呢個角色，大結局感覺好似二次煞科咁！早幾日播咗佢男友小野同Phoebus場男男吻戲，Fish話見到識嘅人拍親熱戲都會特別著緊，不過唔關事係咪小野，而佢就嫌場戲唔夠激喇，想知多啲睇足本訪問啦！
