【viu】劉松仁、王梓軒今日出席音樂劇《利瑪竇》三度公演記者會，擔任藝術總監嘅松哥，花五年時間創作及籌備，佢自稱係打雜，台上眾演員分享與松哥合作點滴，當中梓軒透露十年前跟松哥拍劇，因為自己有一場戲演得唔好，獲汪阿姐召喚松哥入廠教演戲；另一演員分享一次腳傷，獲全無架子嘅松哥幫忙按腳14日，真係超有愛，即場獲頒「利瑪竇精神獎」。
曾傳中風嘅劉松仁，今日精神好好，而且風趣幽默，佢話好鍾意同成班年輕人合作，可以吸多啲「陽氣」！對於曾有不實報道話松哥「死咗」，佢大方話冇嬲，但依家年紀大會更加注意健康，做運動、多休息，仲跟梓軒嘅飲食餐單keep好身體；相識多年嘅神父同舊情人李影相繼離世，亦令松哥看化好多。嚟緊《利瑪竇》計劃巡迴演出，梓軒話會幫忙勸松哥復出幕前客串，仲爆與松哥有個3年之約計劃一齊推出CD，咁多豐富內容快啲click入睇片。
