【Viu】「豹哥」陳蕾是晚繼續唱爆紅館，尾場絕不留力！唱到《相信一切是最好的安排》，未起歌全場「仙子」已企晒起身standby喪揈，前兩晚各有一位幸運仙子獲仙女揸機selfie，尾場又有冇幸運兒呢？仲捉到豹哥偷偷派心添！
連唱2個鐘後，豹哥終於開金口啦！佢先感謝4位「蕾安多芬」學員Kim@ROVER、亨仔@ROVER、Nathan、Tiger Foo擔任嘉賓，除咗叫仙子們拍手畀學員之外，更要拍手畀佢，仲抵死自誇夠膽邀請冇咩舞台經驗嘅四子，仲冧豬話：「節目係一時，友誼係一世！」
戲肉嘅部分嚟啦！豹哥自爆首場credit位講咗30分鐘搞到超時要罰錢，尾場又點會唔去盡佢先？其中最精彩嘅部分就梗係同Dida boy嘅對話，呢晚洪嘉豪點「中槍」法？有咩令豹哥更sure院長唔做Dida位係一個最明確嘅決定？
呢晚全場仙子舉「多謝陳蕾」手幅送驚喜，令豹哥淚崩，仲話估唔到新歌《念》「拯救」咗好多fans，最後喊住唱最後一首歌《凡星》，場面感人！encore部份，豹哥一如前3場以結他自彈自唱《夢中人》！
另外，台下嚟睇騷嘅有MC張天賦、肥仔@ERROR、岑寧兒、陳詠謙、Jace陳凱詠、張蔓莎、Eddy@Zpecial、ToNick、小塵埃、周柏豪、鄧小巧等。
