【Viu】「豹哥」陳蕾一連4場處女紅館騷噚晚頭場，座無虛席！一開騷豹哥就連人帶棺材造型嘅鋼琴升上台，全新銀髮色兼全白配頭紗look有驚喜！不過點都唔夠當豹哥自彈自唱完第一首歌《我想和你好好的》後，企上部琴度突然間「中槍」，血染白衣再瞓喺棺材面，超逼真效果睇到全場「仙子」當堂「嘩」出聲！
而是晚另一個焦點就落喺蕾老師同《造星V》其中4位「蕾安多芬」學員，Kim@ROVER、亨仔@ROVER、Nathan、Tiger Foo，重現《伸縮自如的愛》MV入面嘅夾band畫面！擔任鼓佬嘅Nathan更係自宣布退賽後首度公開露面！蕾老師踢爆4子當時拍MV只係扮彈，所以對佢哋為呢次上紅館表演喪練勁感動！
除咗一班造星仔仔做嘉賓之外，仲有「Gi導」張蔓姿為豹哥鋼琴伴奏《你快樂嗎？》！最後以全場大合唱《凡星》作結！至於Encore部份，豹哥口講齋出嚟兜個圈就走，查實一早準備好支木結他，帶嚟佢busking時期成日唱嘅《夢中人》，又自爆當時經歷低潮，一度想放棄做歌手嘅念頭！但仙子們好似更想睇到仙女跳舞加表演韓式呼吸，去片睇吓仙女又有冇應承！
