【Viu】賀歲片《飯戲攻心2》今晚舉行首映見面會，「飯團」曬冷現身，張繼聰、Stephy鄧麗欣、Peter陳湛文、林明禎、Ivana王菀之、阿Dee何啟華、Jeffrey魏浚笙、楊偲泳等，勁墟冚呀！
阿聰預告隨時會入戲院「突襲」fans，睇吓佢哋笑到幾大聲咁話！Ivana就超豪氣，話會揞荷包包場請親朋好友睇戲，Peter亦話會帶2歲囡囡睇戲，仲爆囡囡依家係超越明禎BB，完美copy「親一個 muah」呢個招牌動作，甚至扮埋佢金機械人嘅口頭禪添！Stephy指《飯戲2》其中一個目標係超越上集，但就冇票房壓力嘅！
明禎為兌現着旗袍謝票嘅承諾，佢話最近真係去物色緊啲靚旗袍，又拉埋阿Dee、Jeffrey「落水」一齊着唐裝，不過阿Dee就笑話着童裝盞鬼啲！呢日Jeffrey唔舒服失聲，咁啱「愛人」阿正近日都唔舒服，莫非佢哋⋯？Jeffrey前日去睇MIRROR亞博騷撐兄弟Edan，大讚對方以極高音唱《皮囊》超勁！
另外，阿Dee同肥仔主持嘅新節目《晚吹 - 404_886流量密碼》最近熱播，飛去台灣同多位靚女見面，但阿Dee重申並非自肥計劃，仲話冇一個靚女令佢有心動嘅感覺，係真唔係呀？佢又好誠實咁話有follow對方嘅IG，傾「南、北半球」相關嘅「地理題」，睇下咩pose最吸like！至於男仔嘅pose，都可以學「大表波」Stanley，不過阿Dee話要交畀男神Jeffrey呈現啦！
