【Viu】睽違5年，日本歌姫中島美嘉今日再度訪港，逗留3日2夜，準備宣傳明年2月舉行嘅香港演唱會。約下午2點出閘嘅美嘉，以黑衫配牛仔褲造型現身，外表同身形真係十年如一日，依然又型又索！佢先停步大方跟傳媒同Fans揮手問好，當有人恭喜美嘉早前再婚時，佢笑而不語，仲True爆咁指覺得香港好熱，對於喺34度高溫下工作嘅小編表示，不能認同更多！
美嘉步行去停車場期間，密密收Fans禮物，又不時同大家揮手道謝，超級親民！雖然未能為專程由澳洲返港接機嘅男Fans簽名，但佢都有合十示意抱歉。美嘉邊行邊指再見到香港Fans覺得好開心同興奮，問到佢最想食咩時？仲反問大家有咩推介，聽到有人推介佢去飲茶食點心後，又笑笑口答：「好呀！」唔知各位Fans會唔會喺茶樓野生捕獲呢位天后呢？
