【Viu】Jeremy李駿傑將於9月8號生日，為咗慶祝米米28歲嘅大日子，FC由今日起至14號喺商場舉辦名為「CLOSERLAND」嘅生日嘉年華，開放畀公眾入場參觀，同Jeremy & Unicorns齊齊享受華麗盛宴。
FC Admin CW推介三大打卡位，包括入口嘅巨型LED Wall，無限loop Jeremy嘅高質飯拍；3.5米高、棱鏡造型裝置，將華麗同可愛嘅Jeremy共冶一爐，仲有米米嘅親筆信同心意牆；Jeremy魔衣櫥，展出MV同得獎戰衣及獎座。現場仲有設計精美嘅限量版生日精品，各位Admin亦率先送上生日祝福，集氣Jeremy明年再開騷！
