【Now.com】藝人張致恒（Steven）與太太區燕雯（雯雯）婚姻關係時好時壞，雯雯更不時在Instagram數臭Steven，多次鬧婚變但又未有付諸實行。最近卻突然自爆懷有第四胎，更趁機開設每個月收費50元的Instagram帳戶，希望增加收入幫補家計，老公Steven更激罕開live呼籲大家付費支持老婆。不過事件峰迴路轉，臨盆在即的雯雯日前在在Instagram Story寫下千字文放負，宣布結束收費IG！
雯雯以黑底白字撰長文，先指自己因早前被指控兩人以夫妻不和為賣點作宣傳，而情緒崩潰：「的確我係好失敗，我承受唔到外界嘅打擊，甚至壓力。今日嘅新聞導致我變左（咗）騙子，收到好多msg話我借張致恒出位，如果唔係邊有人識，但我從來冇諗過要出名，甚至做一個名人，我只係已經被逼度（到）爆煲，諗唔到其他地方去發洩，所以就會不停打一啲嘢出嚟。」她續解釋自己苦心經營IG全因排除有黑心或並非真心關心自己的人在其社交網出現，又可賺錢交租及生第4胎，她直指「試問有邊個會鍾意俾人笑做小丑」，但如非這樣做，「我成個屋企就會瞓街」。
雯雯隨後在文中重提老公不滿被數臭倒米，直斥Steven沒有真正改變安守本分：「我喺屋企捱生捱死，大住肚照顧小朋友，你冇比（畀）任何嘅金錢我哋去食飯買奶粉尿片睇醫生，我都係靠自己，不停揾朋友幫。」更指老公在婚後依然背住她四出溝女：「你溝女對住啲女仔去數自己老婆嘅時候，你又有冇諗過我？我今時今日公開去講你去發洩，我相信你嘅傷害唔會夠我大！」雯雯再怒斥張致恒「從來沒有悔疚心」，又希望自己在第四胎出世後另有出路：「我相信我生完我一定會有出路，我唔需要再留喺度....」
雯雯在文末表示自己承受不到外界評擊，所以過了今個月便會取消收費IG：「預先畀咗錢嘅朋友，我會退番錢俾你哋，我希望從此之後，所有嘅人都可以放過我。」
PHOTO/ Instagram@ugly_mama2.0、Instagram@ugly_mama、Instagram@stevencheung
