【Viu】
愉景灣今日繼續舉行沙灘音樂節，Day2嘅嘉賓有黃偉晉@五堅情、盧廣仲、張蔓莎、Strayz、kayan9896等，有過江龍又有本地薑，現場氣氛當然HOT到爆啦！
偉晉今次單拖上台，同「九澤CP」陳零九、邱鋒澤分開日子演出，佢就話咁先可以吸引到大家嚟足兩日！問到佢哋喺香港有冇會合見面，偉晉話冇見面，仲講笑話佢哋不和添！為咗今次演出，偉晉都特登揀咗林家謙嘅《一人之境》送俾香港fans，佢一登場，觀眾即時嗌到拆天，偉晉仲喺台上拎起水喉向觀眾噴水，搞到自己成身都濕埋，佢一除外套，fans即大叫：「脫 ！脫！脫 ！」最後偉晉都有順應民意，除衫大騷佢健碩嘅body，但當大家再叫佢除褲嗰陣，偉晉就即話：「不行啦！」非常搞笑。
而盧廣仲就戴住黑照兼以全黑造型登場，盧廣仲咁多經典歌，全場梗係首首都跟住大合唱啦！fans仲喺佢每唱完一首歌就大叫encore，而盧廣仲就一次又一次搞笑咁講：「新年快樂！」全場笑爆嘴！之後佢仲問大家，佢嚟香港開演唱會好唔好？台下即刻興奮狂嗌：「好」！
Sabrina張蔓莎就以短裙Look示人，喺戶外演出佢都特別興奮：
「今日好開心見到好多朋友 ，出場時亦有啲緊張、心跳得好快，我一直都好鍾意戶外騷，第一次喺陽光下演出感覺好好，頭先落咗一陣雨，所以冇咁熱。」至於Strayz就因為Ariel去咗韓國進修而五缺一，但都冇阻佢哋首次參與戶外沙灘騷嘅好心情，CK、Val同埋Nat仲著得相當清涼，以小背心示人添，但暐翹居然為咗型而著冷衫，真係睇見都戥佢熱啊！
