【Viu】 風靡全港嘅黃色橡皮鴨「Double Ducks」再度訪港，未展出已掀起打卡潮，除咗維港之外，仲登陸各大港鐵車站內，呢日肥仔@ERROR、Win Win （楊安妮）現身港鐵站「追鴨」同拍片， 肥仔仲要孭住Win Win四圍跑，搞到周身汗，仲笑Win Win好有份量添！而拍攝期間肥仔被Win Win踢中小腿，搞到即場慘叫，仲講笑話被「後輩」攻擊，之後佢哋即場教Fans一齊大跳「鴨仔舞」，「重點扮鴨要用雙手，因為單手就會變咗《Megahit》嘅手勢，記住係用雙手，個頭再不停咁伸前咁就神似！」
肥仔仲突然想當年，記得橡皮鴨第一次訪港已經全城哄動，自己都專程打卡，而Win Win就話被「鴨仔」嘅巨大身型震攝，十足肥仔一樣「夠晒份量」，唔會輕易被吹走，仲話打算會去現場打卡。其實佢哋兩個平日都不時會坐交通工具，仲會成為Fans打卡嘅對象，肥仔仲搞笑咁話：「我呢啲咁優秀嘅男人，簡直就係『 漆黑中嘅螢火蟲 』一樣，佢哋成日話『我老公好鍾意你啊』，我會回翻佢哋『我都好鍾意你老公！』」。
