【Viu】 今年係陳慧敏出道十周年，佢最近推出新歌《十年如一日》，審視返過去嗰十年，先發現原來冇任何令自己滿意嘅成績。慧敏哥之前一直港澳兩邊走，面對唔穩定嘅生活，佢都曾經萌生轉行嘅念頭。不過佢為咗音樂夢，決定放棄一段三年嘅異地戀，仲自組工作團隊重新出發，而新歌就特別搵嚟黃金組合林夕同埋澤日生作曲填詞，慧敏哥話當收到歌詞嘅時候，簡直喊到收唔到聲啊！慧敏哥曾經參與多個歌唱比賽，2010年因為一個歌唱節目而多咗觀眾認識，不過往日嘅同伴例如許廷鏗、林欣彤、馮允謙等等都各自登上多個舞台，慧敏哥見到佢哋喺樂壇有唔同嘅成就，會唔會有所比較呢？
