【Viu】出爐金馬影后張艾嘉出席《Yahoo搜尋人氣大獎2022》頒獎典禮獲頒「亞洲人氣演員」，自爆平時最多係search食譜。雖然謙稱同現今世代「脫節」，但佢都話有留意新一輩嘅演員、歌手，仲爆ERROR好乖、好有禮貌咁主動同佢打招呼。
被張姐點名力讚嘅ERROR繼續省靚「好乖」呢塊招牌，直頭講到唔介意做真人版「企鵝」都想同張姐合作，就算冇得休息都唔緊，正如佢哋早幾日一完九展騷就直踩廿個鐘拍劇，不過阿Dee唔小心「冧廠」，啲隊友聽到佢話勁驚確診，竟然抵死望佢快啲「中招」，咁就可以坐少一陣頒獎禮。至於影帝張家輝日前都話想同四子拍戲兼合唱，佢哋就即刻獻計，一時話要做「契弟」、一時又話出廣普乘泰文歌。
「年度風雲人物」得獎者古天樂受訪開心話：「證明今年嘅努力冇白費！」正拍緊新戲嘅佢透露農曆新年會搞春茗相聚，仲預咗準備一大筆現金獎勵員工添！另外，《飯戲攻心》獲「本地電影」獎；張繼聰同周秀娜分別攞「本地男、女演員」；「本地新演員」由王丹妮奪得；袁澧林就拎「新世代演員」獎；「人氣急星」有193、Kayan9896等。
